Gizartea -
TRAFIKOA
Santanok "etsipena" adierazi du Biriatuko bidesariak AP-8an eragiten dituen auto pilaketen aurrean
Gipuzkoar herriko alkateak "konponbideak" eskatu ditu egunotan izaten ari diren trafiko kolapsoen aurrean, aurten aurreratu egin baitira azken urteekiko.
AGENTZIAK | EITB MEDIA
Jose Antonio Santano Irungo alkateak mugako herriaren "etsipena" adierazi du AP-8 autobidean, udalerriaren parean, izaten ari diren "auto-ilaren" aurrean.
Prentsaurrekoan, Santanok gogora ekarri du AP-8ko mugako puntu horretan ohiko fenomenoa direla auto pilaketak, "urtero abuztuaren amaieran gertatzen dena", baina orain arte ez direla "hilabete erdialdera gertatu".
Irundar alkateak nabarmendu egin du "asteazken arratsaldean hiriak jasan zuen trafiko kolapsoa, hiriguneko zati handi batean eta AP-8ko ilara kilometrikoen aurreko sarbide nagusietan". "Atzo gertatutakoaren aurrean, gure etsipena adierazi nahi dut", azpimarratu du.
"Badakigu beti abuztuaren amaiera aldera gertatzen den fenomenoa dela, baina frogatu dugunez, aurten nolabait areagotu da, Biriatun dagoen bidesari bat eta horren kudeaketa bitarteko, auto pilaketak dakartzaten kontrolek lagunduta, eta zenbait unetan bidesariko jarioa eteten du", azaldu du.
Santanok azaldu duenez, "ibilbide luzeko ibilgailuen jarioa egon zen; ez kamioiena bakarrik, baizik eta iparraldera egindako oporretatik bueltan datozen kotxeena eta pertsonena ere".
"Beste behin, abuzturo bizi izaten dugunaren antzekoa da gutxi gora behera, baina beste data batzuetan, agian", adierazi du. Gaineratu duenez, "abuztuaren 18a zen, asteazkena, eta agendaren eta poliziaren aurreikuspenean ez zegoen jasota Itzulera Operazioaren lehen kolpetzat jo dezakeguna".
Irungo alkateak "kezka" azaldu du "iparraldera doazen milaka ibilgailuren kolpe garrantzitsu" horren aurrean. "Datozen asteetan urtero bezala" gertatuko direla aurreikusi du, eta "konponbideak" eskatu ditu.
"Uneren batean erabakitasunez jorratu beharko dira bidesari horrekin lotutako zenbait aldaketa, hiriak atzokoa bezalako kolapsorik jasan ez dezan, herritar askoren joan-etorriak oztopatu zituena", amaitu du.