Gizartea -
KORONABIRUSA
Txertaketa pauta osatzeko deia egin du Osasun Publikoko Batzordeak, covid-19aren aldaera berrien aurrean
Txinan covid-19 kasuek izan duten gorakada dela eta, bilera egin du, gaur goizean, Osasun Publikoko Batzordeak —autonomia erkidegoek eta Espainiako Osasun Ministerioak eratzen duten taldea—, egoera aztertu eta aurrera begirako erabakiak hartzeko.
EITB MEDIA
Covid-19aren aldaera berrien aurrean, txertaketa zikloa osatzeko deia egin die herritarrei Osasun Publikoko Batzordeak, eta horretarako kanpaina bultzatzeko erakundeei, bereziki, pertsona zaurgarrienak babesteko. Batzorde horren hitzetan, txertoaren indartze dosiak aldaera berriei aurre egiteko egokituta daude.
Halaber, covid-19aren aldaera berrien agerpena goiz atzemateko baliabideak jartzearen eta "sekuentziazioa indartzearen alde" egin dute autonomia erkidegoek eta Espainiako Osasun Ministerioak, goizean egin duten bileran. Hain zuzen, Txinan covid-19 kasuek izan duten gorakada dela eta bildu da Osasun Publikoko Batzordea, egoera aztertu eta aurrera begirako erabakiak hartzeko.
Osasun Ministerioak jakitera eman duenez, azken hilabete honetan Txinan agertu den XBB.1.1. aldaeraren —Kraken izenez ezaguna— hainbat kasu agertu dira, dagoeneko, EAEn eta Madrilen.
Aurreko astean baieztatu zuen Eusko Jaurlaritzako Osasun Sailak Kraken aldaeraren zenbait kasu atzeman zituztela, baina "kasu isolatuak" zirela nabarmendu zuen, eta ez zutela Txinarekin loturarik.
Bestalde, Osasunaren Munduko Erakundeak toki itxietan eta garraio publikoan maskara erabiltzea gomendatu zuen atzo, Txinan izaten ari den covid-19 kasuen hazkundearen aurrean.