Zirkulazioa normaltasunera itzuli da Barazar mendatean

Barazar mendateko N-240 errepidean, zirkulazioa bere onera bueltatu da 14:30ean, ordubete eskasean kamioi-istripu bi izan ostean. Ondorioz, zirkulazioa kolapsatu egin da.

Herrizaingo Sailak jakitera eman duenez, 14:30ean, bidea garbitu eta istripua izan duten ibilgailuak erretiratu ostean, Bilborako noranzkoan ireki dute errepidea, bi puntutan itxita egon eta gero.

Lehenengo istripua 10:50 inguruan jazo da. Ordu horretan, bi kamioik elkar jo dute errepide horretako 33,6. kilometroan, baina ez da biktimarik izan.

11:40an, beste kamioi batek istripua izan du handik gertu, 34,6. Kilometroan; horrek ere, Bilborako noranzkoan.

Istripu horren ondorioz, zama errepidera erori da, eta Bilborako bidea itxi egin behar izan dute. Ertzaintzak beste bide batetik bideratu du zirkulazioa.