Punturik galdu ez duten gidariek bat izango dute opari

Trafiko Zuzendaritza Nagusiak (DGT) puntu bat oparituko die datorren uztailaren 1etik aurrera, puntuen gidabaimena indarrean jarri zenetik, punturik galdu ez duten 18 milioi gidari ingururi. Espainiako gidarien % 69k hamabost puntu izango dituzte, gidatzeko era egokiagatik.

Puntuen gidabaimena abian jarri zutenetik, Trafiko Zuzendaritza Nagusiaren Erregistro Orokorrean erroldatuta dauden 26 milioi gidarietatik, 4,9 milioik (% 18,8) puntuak kentzen dituen arau-hauste bat egin dute, horietatik 1,4 milioik arau-hauste bi edo gehiago egin dituzte.

142.015 pertsonak galdu dute gidabaimena, gidarien erroldako % 0,5ak. Gainera, horietako 2.462k birritan galdu dute.

Puntuak kentzen dituen arau-hauste kopurua 7,2 milioikoa da, guztira 22 milioi puntu galdu dituzte gidariek. Hainbat dira puntuak kentzeko arrazoiak: bidean ezarritako abiadura mugak ez errespetatzea(% 46); segurtasun uhalaren erabilera eza (% 13); telefono mugikorretik hitz egitea gidatzen ari zaren bitartean (% 9); eta alkohola edan ostean gidatzea (% 9).