Gizartea -
Hilketa Irunen
Erkoreka: "Konfirmatu daiteke batek bestea erail zuela eta gero bere buruaz beste egin zuela"
Segurtasun sailburuak Legebiltzarraren atarian egin duen agerraldian azaldu duenez, hilketa egon zela egiaztatu dute auzitegiko medikuek eta ikerlariek. Biek ala biek harreman ekonomikoa zutela ere erantsi du. Gainerakoan, "hipotesi guztiak zabalik daude", azpimarratu du.
EITB Media
Josu Erkoreka Eusko Jaurlaritzako Segurtasun sailburuak jakinarazi duenez, Polizia Zientifikoak egindako ikerketen ondorioz "baieztatu daiteke batek, J. Recaldek, bestea, alegia I. Abrego, erail zuela eta gero bere buruaz beste egin zuela".
Erkorekak agerraldia egin du Legebiltzarraren atarian atzo Irungo Olaberria auzoko baserri batean eskopeta tiroekin hilotz topatutako bi gizonen inguruko ikerketaren datu berriak emateko.
Sailburuaren hitzetan, biek harreman ekonomikoa zuten eta "jabego eta negozio batzuk partekatzen" zituzten, baina hilketa zerk eragin zuen azaltzeko orduan, "oraindik ere hipotesi guztiak zabalik daude", azpimarratu du.
"Gauza asko esaten ari dira, baina gaur-gaurkoz ezin daiteke ezer seguru baieztatu, denetarako hipotesiak daudelako, eta gehiago ikertu behar delako", gaineratu du.
Erkorekaren arabera, "egitate oso itzal eta tragiko baten aurrean" gaude eta horrek "sufrimendua" eragiten die familiei. Hori horrela, agerraldiaren hasieran "hurbiltasun mezua" bidali die denei.