Entzierro arriskutsua, baina ez da adarkadarik izan

Madrilgo Victoriano del Rio ganadutegiko zezenek 2012ko sanferminetako entzierro azkarrena egin dute seigarren egunean, bi minutu eta 20 segundo behar izan baitituzte ibilbidea egiteko.

Entzierroa azkarra izan bada ere, eta tentsio momentuak bizi izan badira ere, ez da adarkadarik izan eta Iruñeko ospitalera eraman dituzten zaurituek kolpeak dituzte soilik.

Emozioa izan da nagusi entzierroaren hasieratik. Ukuiluko ateak ireki eta berehala, zezenak ziztu bizian atera dira eta buruan jarri diren bi animaliek irrist egin dute. Ondorioz, pixka bat atzean geratu dira eta horrek arriskuan jarri ditu korrikalariak.

Udaletxeko plazan ere momentu arriskutsuak bizi izan dira, izan ere, zezenetako bat korrikalari baten kontra oldartu da, baina azkenean ez dio adarkadarik eman eta ibilbidea egiten jarraitu du.

Mercaderes kaleko bihurgunetik aurrera, zezen taldea bakantzen hasi da. Hortik aurrera hasi dira zezenen adarren inguruan korrikaldi politak egiten.

Zezen plazara iritsi eta inongo arazorik gabe sartu dituzte animaliak ukuiluan.