Gizartea -
Bizkaia
Bilboko kutxazain automatiko batean izandako bonbona-leherketa bat ikertzen ari da Ertzaintza
La Peña auzoko banketxe baten kutxazain automatiko batean, bertan lapurreta egiteko helburuz, kanpin-bonbona batekin eztanda bat eragin zuen gizonezkoaren bila dabiltza.
AGENTZIAK | EITB MEDIA
Ostiral honetako goizaldean Bilboko kutxazain automatiko batean izandako bonbona baten leherketa ikertzen ari da Ertzaintza, Eusko Jaurlaritzako Segurtasun Sailak larunbat honetan jakitera eman duenez. Ostiral honetan, 02:20ak aldera, jazotako gertaera argitzeko ikerketa poliziala abiatu dutela jakinarazi du Sail horrek.
Bestalde, El Correo kazetak argitaratu duenez, kanpin-bonbona batekin eztanda eragin zuen pertsona horren bila dabil EAEko Polizia. Bilboko La Peña auzoan gertatu da, Zamakola kalean kokatutako banketxe baten kutxazain automatikoan.
Gizonezkoak kable bat eta kanpin-bonbona bat manipulatu omen zituen, eta billeteak ateratzen diren zirrikitutik gasaren pita sartu zuen, dirua lapurtzeko helburuz.