Gizartea -
Trafikoa
12 hildako izan ziren EAEko errepideetan aurtengo lehen seihilekoan, iaz baino bost gutxiago
Aurtengo urtarriletik ekainera bitartean hiru oinezko, zazpi gidari eta bidaiari bi hil ziren auto-istripuz. Larri zauritutako pertsonen kopurua ere murriztu da, iaz baino bi gutxiago izan direlako aurten.
AGENTZIAK | EITB MEDIA
Urteko lehen seihilekoan 12 pertsona hil ziren EAEko errepideetan (hiru oinezko, zazpi gidari eta bidaiari bi), iazko lehen seihilekoarekin alderatuta, bost hildako gutxiago (- % 29,4), Eusko Jaurlaritzako Segurtasun Saileko datuen arabera.
Gainera, 125 pertsona larri zauritu ziren Euskadin izandako trafiko-istripuetan, iaz baino bi zauritu gutxiago (- %1,5). Ezbehar horietan 1.408 zauritu arin izan ziren (2022an baino 13 gehiago). Hortaz, auto-ezbeharretan izandako biktima kopurua 1.545ekoa izan zen, 2022an baino sei biktima gehiago (+ % 0,39).
Hilabetei erreparatuta, urtarrila eta maiatza izan ziren hilabete hilkorrenak, hiru hildako banarekin (hiru oinezko urtarrilean eta hiru gidari maiatzean). Otsailean bi bidaiari hil ziren; maiatzean bi gidari; apirilean beste bi gidari; eta ekainean, ordean, ez ziren hildakorik izan.
