Gizon bat atxilotu dute Madrilen emakume baten hilketarekin lotuta

Hilketa matxista gisa ari ziren ikertzen kasua. Atxilotuak polizia-etxean aurkeztu zuen bere burua igande gauean.

Gizona, atxilotu duten unean. Argazkia: EFE

agentziak | eitb media

publikatuta: 2023/09/25 09:47 (UTC+2)

azken eguneratzea: 2023/09/25 10:29 (UTC+2)

Polizia Nazionalak gizon bat atxilotu du 36 urteko emakume baten hilketarekin lotuta. Madrilgo Villaverde barrutian hil zuen emakumea. Dirudienez, bertan bizi ziren biak, eta lehen hipotesien arabera, bikote ziren.

Madrilgo Polizia Nazionalak gaur, astelehenarekin, jakinarazi duenez, indarkeria matxista kasu gisa ari ziren ikertzen hilketa. 30 urteko atxilotuak bere burua aurkeztu du bart polizia-etxean, eta hilketa delitua egotzi diote.

Orain arte ikertutakotik ondorioztatu dute bikote zirela, nahiz eta oraindik ez dakiten gizonak indarkeria matxistarekin lotutako aurrekariak ote zituen.

Igandean, 04:00ak aldera, gertatu zen hilketa, Doña Francisquita kaleko etxebizitza eraikin batean. Antza, bertan bizi ziren biak.

Bizilagun baten deia jaso zuten agenteek, eskailera-buruan zauritutako emakume bat zegoela ohartaraziz, ikerketa iturriek zehaztu dutenez.

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.

Hau zure interesekoa bada, baliteke beste gai hauek ere izatea

Indarkeria matxista Gizartea Indarkeria matxistaren biktimak Eguneko albisteak Albisteak Madril Matxismoa

Gizon bat atxilotu dute Madrilen emakume baten hilketarekin lotuta

Esteka kopiatuta