Sei urteko espetxe-zigorra jarri diote gizon bati emakume bati sexu-erasoa egitea egotzita, Gipuzkoan

Gipuzkoako Lurralde Auzitegiak sei urteko kartzela-zigorra jarri dio gizonezko bati emakume bati sexu-erasoa egitea egotzita. Emakumeak erasoa jasan eta urtebetera salatu zuen gertakaria, eta Auzitegiak azpimarratu du "beharrezkoa" dela "biktima guztiek behar dituzten epeak errespetatzea prozesu judizialera iritsi aurretik".

Gipuzkoako Auzitegiko lehenengo atalak irailaren 28an kaleratutako ebazpenean agertzen denez, 2019ko azaroaren 24an izan erasoa, bikotea etxera itzuli zenean.

Epaian agertzen denez, akusatuak emakumea gaixorik zegoela ("eztarriko mina, sukarra eta dardarak") aprobetxatu zuen bere borondatearen aurka, eta "ezetz esan eta gero", sexu-erasoa egiteko. Emakumeak "ez zuen aurre egiteko indarrik" eta "mugitu ezinda geratu zen, izoztuta", gizonak sexu-erasoa egiten zion bitartean.

Fiskaltzak 12 urteko kartzela-zigorra eskatu zuen, baina Auzitegiak uste du sei urterekin nahikoa dela.

Era berean, gizonak 8.800 euro eman beharko dizkio biktimari ardura zibil gisa, eta ezingo da beregandik 300 metro baino gutxiagora hurbildu.

Espetxe-zigorra amaitu eta beste bost urtez, erasotzailea ezingo da biktimarekin inola ere harremanetan jarri, eta zaintzapeko askatasunean egongo da presondegitik atera eta hurrengo sei urteetan. Dena dela, akusatuak helegitea sartzeko aukera du oraindik.