Gizartea -
Eguraldiaren iragarpena
Giro eguzkitsua eta 35º-rainoko tenperaturak, astearte honetan EAEn
Gaur beroa izango dugu lagun. Hala ere, iluntze aldera bero-hodeiak garatuko dira, eta litekeena da han-hemenka ekaitzak izatea. Asteazkenerako termometroak behera egingo du.
Erredakzioa
Udako giroari eutsiko diogu uztailaren azken egun honetan. Horrela, Euskalmet Euskal Meteorologia Agentziaren arabera, astearte honetan bero egingo du, batez ere barnealdean, izan ere tenperatura maximoak 30-35º artekoak izango dira. Kostaldean, beroa arinagoa izango da, brisari esker bereziki, baina hala ere balio altuenak ez dira 30º-tik oso urrun ibiliko.
Beroaren eraginez arratsaldean trumoi-hodeiak garatuko dira, eta baliteke eguna amaitzerako zaparradak botatzea han-hemenka, bereziki ekialdean. Bitartean, zerua garbi egongo da.
Asteazkenean aldaketa datorkigu. Iparraldeko haizea nagusituko da, eta kantaurialdean hodeiak nagusituko dira zeruan. Goizean hodeitza trinkoagoa izango da, eta baliteke euri pixka bat egitea. Hegoaldean, aldiz, zerua hodei gutxirekin egongo da. Ipar partean tenperatura nabarmen jaitsiko da; aldiz, jaitsiera suabeagoa izango da hegoaldean.
