Gizon bat atxilotu dute Gasteizen, emakume bat atxiki eta mehatxatzea leporatuta

Gasteizko Udaltzaingoak 28 urteko gizon bat atxilotu du emakume bat labanarekin mehatxatu eta bere borondatearen kontra atxikitzea leporatuta. Antza denez, diru truke sexu-zerbitzuak eskaini zizkion emakumeak, eta gizona ez zen gustura gelditu emandako zerbitzuarekin.

Udalak ohar bidez jakinarazi duenez, gizon batek eman zien abisua Txagorritxu auzoan zaintza-lanak egiten ari ziren agenteei ostiral goizaldean.

Lekukoaren testigantzaren arabera, atxilotutako gizonak emakume bat atxiki zuen logela batean, eta labana batekin mehatxu egin zion, "emandako sexu-zerbitzuarekin ados ez zegoelako".

Etxebizitzara sartu ziren agenteek, emakumea askatu ez ezik, ustezko erasotzailea atxilotu zuten. Biktima, berriz, ertzain-etxera eraman zuten.

Atxilotua ostiral honetan igaro da epailearen aurretik, legez kanpoko atxikitzea eta labana batekin mehatxu egitea egotzita.