Euskadiko 17 federaziok bat egin dute kirolean euskara sustatzeko ekimenarekin

Kirolean euskara sustatzeko ekimenari 17 federazio atxiki zaizkio dagoeneko. Hain zuzen ere, Euskal Kirol Federazioen Batasunak (EKFB-UFDV) eta Eusko Jaurlaritzako Kultura eta Hizkuntza Politika Sailak sustatzen dute proiektu hori. 

Akordioak aisialdian eta, kasu honetan, kirolean euskararen erabilera normalizatzea du helburu. Guztira 17 federazio, bazkideen % 35, atxiki zaizkio euskararen erabilera sustatzeko akordioari 2022tik gaur arte.

Ostiral honetan euskara sustatzeko hainbat ekintza aurkeztu dituzte Bilbon, Azkuna Zentroan egindako ekitaldian. Bertan izan dira Bingen Zupiria Kultura eta Hizkuntza Politikako jarduneko sailburua, Leixuri Arrizabalaga Bizkaiko Euskara, Kultura eta Kirol diputatua, Angel Gurrutxaga EKFB-UFDVko presidentea eta euskal federazioetako ordezkari ugari.

Federazioei laguntzeko ekintzen artean, honako hauek daude: euskara-diagnostikoak eta -planak egitea, eskola-kiroleko entrenatzaileentzako eta begirale laguntzaileentzako prestakuntza-ikastaroak, hizkuntza-estrategiei buruzko prestakuntza, informazio-pilulak eta kontzientziazio-kanpainak egitea.

Zupiriak nabarmendu duenez, kirola eskolaren eta kalearen arteko "zubia" da gazte askorentzat, eta, ildo horretan, etorkizunean euskararen erabilera areagotzeko esparru estrategikotzat jotzen da.

Bestalde, Gurrutxagak nabarmendu du federazioak euskararen erabileraren eta normalizazioaren alde inplikatzeak "erritmo onean" egiten duela aurrera, baina "urratsak ematen jarraitu" behar dela. Horrela, "garrantzitsua da federazioetan ekintzak bultzatzen jarraitzea eta, aldi berean, kirol esparru guztietan euskara sustatzea", adierazi du.

Horixe da 'Gu Geu, Kirola Euskaraz' kanpaina berriaren helburua. Jose Angel Iribar Athleticeko atezain ohia eta Julen Goia eta Iñi Vicens kirolariak ere bertan izan dira, eta kirolean euskara "normaltasunez" erabiltzearen garrantzia azpimarratu dute. Iribarrek adierazi duenez, egoera "asko aldatu da" bera kirolean aritzen zenetik.

Publizitate-kanpaina berri honek euskararen erabilera sustatu nahi du, ez bakarrik elkarteak batzen dituen 48 kirol-erakundeen artean, baita Euskadin kirol federatua egiten duten pertsona guztien artean ere.

Helburua "kirol komunitatea inspiratzea" da; kirolariak, arbitroak, jokalariak, entrenatzaileak edo zuzendariak "haur eta gazteentzat erreferente izatearen garrantzia erakusten duen animaziozko spot baten bidez, bere garaian Jose Ángel Iribar izan zen bezala", azaldu dute arduradunek.

Kanpainak ikus-entzunezko hainbat pieza ditu: sare sozialetan #gugeu etiketarekin ikusi ahal izango direnak, baita kanpainarako berariaz sortutako webgunean ere, non kirolean euskara sustatzeko jardunbide egokien pilulak kontsultatu ahal izango diren.