Albiste izango dira: Hilketa matxista Bilbon, interes tasen jaitsiera, eta fronte hotza

Honako gai hauek hartuko dituzte gaur, 2024ko irailaren 12an, hedabideetako lerroburu nagusiak:

- Hilketa matxista Bilbon: Gizon batek 31 urteko emakume bat hil du Bilboko Santutxu auzoan, Eusko Jaurlaritzako Segurtasun Sailak jakinarazi duenez. Bilboko hilketa matxista goizaldean, 01:00ak aldera, gertatu da Santutxu auzoan, Larreagaburu inguruan, bikotearen etxean. Ertzaintzak ustezko hiltzailea atxilotu du eta ospitalera eraman. 

- Interes tasen jaitsiera: Ezustekorik ezean, Europako Banku Zentralak interes-tasak murriztuko ditu gaur, 25 puntu basiko, % 3,5eraino. Erakundeak aurten egin duen bigarren jaitsiera izango da, ekainekoaren ondotik. Inflazioaren jaitsiera eta ekonomiaren moteltzea badira oinarri horretarako. Halaber, aditu askok beste jaitsiera bat espero dute abenduan.

- Fronte hotza: Hurrengo orduetan fronte batek euri ugari utziko du Euskal Herrian, bereziki kostalde inguruan eta ekialdean. Frontearen ondoren, aire masa hotz bat iristea espero da, eta horrek sasoi honetarako tenperatura oso freskoak utziko ditu asteburuan. Izan ere, larunbatean 5 graduko tenperatura minimoak neurtu ahal izango dira Gasteizen eta Iruñean.