Gizartea -

Indarkeria matxista

Asteartetik aurrera epaituko dute Mario Lopez entrenatzaile ohia adingabe bati sexu erasoa egitea egotzita

Fiskalak 14 urteko espetxe zigorra eskatu du Lopezentzat; akusazio partikularrak, berriz, 18 urtekoa. Gernikako mugimendu feministak mobilizazioa deitu du astearterako. Epaitegi aurrean egingo dute protesta, Lopez epaitzen duten bitartean.

Gernikako saskibaloi taldeko entrenatzaile ohi Mario Lopez
Gernikako saskibaloi taldeko entrenatzaile ohi Mario Lopez
Gernikako saskibaloi taldeko entrenatzaile ohi Mario Lopez

AGENTZIAK | EITB MEDIA

Whatsapp Facebook Twitter Telegram Email

Datorren asteartetik aurrera epaituko dute Gernikako saskibaloi taldeko entrenatzaile ohi Mario Lopez, 1998 eta 2001 artean adingabe bati sexu-eraso jarraitua egitea egotzita. Fiskalak 14 urteko espetxe-zigorra eskatu du Lopezentzat; akusazio partikularrak, berriz, 18 urtekoa.

Hiru egun iraungo du Bizkaiko Lurralde Auzitegian egingo duten epaiketak, eta lehenengo egunerako mobilizazioa deitu du Gernikako mugimendu feministak, salatutako erasoak gaitzetsi eta biktimari babesa emateko. Sare sozialen bidez deitu dute datorren asteartean, epaiketa hasten den egunean, epaitegi aurrean egingo duten protesta.

Epaiketa, bestalde, ateak itxita egingo dute, Bizkaiko Auzitegiak horrela erabakita, biktimaren "intimitatea" zaintzeko. 

Fiskaltzaren arabera, 1998ko uztailetik —entrenatzaileak 31 urte zituen orduan eta biktimak 13— 2001era arte, "aitzakiak jarrita", bere etxera eramaten zuen adingabea entrenatzaileak. Han, neskatoaren baimenik gabe, sexu-harremanak izaten zituzten.

Adingabeak "beldurra" zion entrenatzaileari "agresiboa eta oso zorrotza" zelako berarekin entrenamenduetan, Ministerio Publikoaren esanetan.

Biktimari trauma osteko estresa diagnostikatu zioten, eta laguntza psikologikoa behar izan du. 2023ko abenduan salatu zuen entrenatzaile ohia, eta taldeak kargutik kendu zuen.

Halaber, iragarri zuen akusazio partikular gisa agertuko zela, Lopezek taldearen izen onari ere kalte egin ziola argudiatuta, baina, adingabeak eskatutakoa betez, auzitik aldendu zen geroago.

Azkenik, entrenatzailea taldetik bota zuten, eta kalte-ordaina eman behar izan zioten, zigor-aurrekaririk ez zuelako eta auzi horrengatik zigortuta ez zegoelako.

Hau zure interesekoa bada, baliteke beste gai hauek ere izatea
Saskibaloia Indarkeria matxista Bizkaia Gernika-Lumo Epaiketak Gizartea Eguneko albisteak Albisteak Lointek Gernika Bizkaia Sexu erasoak