Loiun lur hartu behar zuten bi hegaldi desbideratu dituzte haizeagatik

Bizkaia eta Nafarroa abisupean egongo dira arratsaldetik aurrera, haize zakarra espero delako. 18:00etan sartuko da abisu horia indarrean Bizkaian, eta 17:00etan Nafarroan. Eguna hasi denetik, baina, haize-ufada handiak izan dira batean zein bestean.

Horrek eragina izan du Bilboko aireportua helmuga zuten bi hegalditan. 08:15ean eta 08:25ean lur hartu behar zuten Bartzelonatik eta Mallorcatik atera diren bi hegaldi horiek, baina haizeak lurreratzea eragotzi die. Hori dela eta, Gasteizko aireportura desbideratu dituzte, Forondara.

Gainerako hegaldiekin ez da arazorik egon, eta oraingoz, behintzat, ez da hegaldirik bertan behera geratu.

Goizean, orduko 114 kilometroko haize-boladak izan dira Galean (Getxo), 108 km/h-koak Zugaztietan (Trapagaran), eta 105 km/h-koak Cerrojan (Karrantza) eta Matxitxakon (Bermeo).