Gizartea -

EHU

EHUko errektore berri Joxerra Bengoetxeak gaur egingo du karguaren zina

Ajuria Enean hartuko du kargua. Ekitaldian, Imanol Pradales lehendakariak irakurriko du errektore berriaren izendapen dekretua. Ondoren, Joxerra Bengoetxeak karguaren zina egingo du.

Joxerra Bengoetxea. Argazkia: EFE
Joxerra Bengoetxea
Joxerra Bengoetxea. Argazkia: EFE

AGENTZIAK | EITB MEDIA

Whatsapp Facebook Twitter Telegram Email

EHUko errektore berriak, Joxerra Bengoetxeak, gaur hartuko du kargua, Ajuria Enea Jauregian (Gasteiz) egingo duten ekitaldian. 

Zuzenbide Filosofian katedraduna da Bengoetxea Caballero, eta 2024ko azaroaren 26ko hauteskundeetan hautatu zuten EHUko errektore.

Imanol Pradales lehendakariak irakurriko du errektore berriaren izendapen dekretua gaurko ekitaldian. Ondoren, Bengoetxeak karguaren zina egingo du.

Bien hitzak entzun ostean, argazkia egingo diete lehendakariari, Zientzia, Unibertsitate eta Berrikuntza sailburu Juan Ignacio Perez Iglesiasi eta errektoreari, jauregiko sarreran.

Bestalde, ekitaldian izango dira Eusko Legebiltzarraren presidente Bakartxo Tejeria, EHUko errektore kargua uzten duen Eva Ferreira, Deustuko Unibertsitateko errektore Juan Jose Etxeberria, Mondragon Unibertsitateko errektore Vicente Atxa, Euniezeko errektore Eva Eguiguren eta EHUko Gizarte Kontseiluko presidente Joseba Agustin Eizaguirre.

Hauteskundeetako emaitzak

Bengoetxeak bozen % 63,6 lortu zituen azaroko hauteskundeetan; Eva Ferreirak, berriz, botoen % 36,3 eskuratu zituen. 

Parte-hartzeak gora egin zuen unibertsitateko sektore guztietan, eta hautestontzietara deitutako 50.590 pertsonatik 11.081ek eman zuten botoa; horietatik 2.870ek, Ferreirari eta 7.599k, Bengoetxeari. 530 boto zuri eta 82 baliogabe izan ziren.

Hau zure interesekoa bada, baliteke beste gai hauek ere izatea
EHU Euskal Autonomia Erkidegoa Gizartea Eguneko albisteak Albisteak Hezkuntza