Maiatzaren 10ean Nafarroako zubietan euskara aldarrikatzera deitu du Sorionekuak ekimenak

Sorionekuak euskararen aldeko herri ekimenak euskararen aldeko ekitaldia antolatu du maiatzaren 10erako, 'Euskara, etorkizunera zubi' lelopean. Egun horretan, Nafarroako zubiak bilakatuko dira aldarrikapen gune.

Gizarte arlo ezberdinetako nafar ordezkariek bultzatuko dute ekimena: hezitzaileek, kazetariek, kirolariek, artistek, ikasleek, sare sozialetako adituek, enpresariek eta zientzialariek.

Aurpegi ezagunak ditu atzean mugimenduak, Iñaki Perurena harri-jasotzailea, Julen Goldarazena "FlakoFonki" eta Kutxi Romero abeslariak eta Oier Sanjurjo futbolari ohia, besteak beste.

Iruñean gaur egin duten aurkezpen ekitaldian, Ibai Suescun eta Elena Uriz ordezkariek manifestu bat irakurri dute. Horren bidez, "garai zalantzagarri hauetan" zubiak behar ditugula adierazi dute, "sendien, lagunen, bizilagunen, herrien, kulturen eta ezezagunen arteko zubiak".

"Etorkizunerako bidea egin behar dugu. Atzera-bueltarik ez duen zubi hori gainditu beharrean gaude, aniztasunean bidea eginez, euskara sustatzeko, babesteko eta goratzeko, Nafarroa ez litzatekeelako Nafarroa izango euskararik gabe. Horregatik, etorkizunean ere Nafarroa izaten jarraitzeko, euskara ezinbesteko dugu", ziurtatu dute.

Zentzu horretan, "euskara da nafar egiten gaituena", gaineratu dute. "Ezagutu ala ez, menperatu ala ez. Herritarrak gara, eta guztiontzako eskubideetan sinesten dugu. Ez dugu bigarren mailako herritarrak izan nahi. Arduraz jokatzeko garaia dela iruditzen zaigu, berdintasun ezari eta bazterkeriari iskin eginda. Aldaketa garaia da, eta guztion hautua izan beharko litzateke euskara zubi gisa eta etorkizuneko oinarri moduan ikustea", nabarmendu dute.

Horrela, Sorionekuak mugimenduak esan du euskararen aldeko zubiak eraikitzeko konpromisoa hartu duela. Hala eta guztiz ere, horien ustez, "alderdi politikoek, sindikatuek eta gainerako eragileek dute bide horretan urratsak emateko ardura". "Zinez sinesten dugu esparru ezberdinetatik lan egiten denean sortzen den indarrean", erantsi dute.