Epaileak espetxera bidali du Irunen ama labana batekin hiltzea egotzita auzipetutako gizona

Irungo Lehen Auzialdiko eta Instrukzioko 2 zenbakiko Epaitegiak ostiral honetan erabaki du espetxeratzea asteazkenean Irunen amari labanaz eraso egiteagatik atxilotutako 47 urteko gizona.

Atxilotu ostean ertzain-etxera eraman zuten, eta ostiral goizean utzi dute epailearen esku. Galdekatu ostean, epaileak espetxera bidali du, iturri judizialek jakitera eman dutenez.

Gertakariak asteazkenean izan ziren, 13:30ean, Irunen. Ustezko erasotzailea amaren etxera joan zen, eta labana batekin eraso egin omen zion. Ustezko erasotzailearen izeba batek eta biktimaren bikotekideak esku hartu zuten emakumeari laguntzeko, eta erasotzaileak motozikleta batean alde egin zuen.

Biktima ospitalera eraman zuten, larri; ustezko erasotzailea, berriz, minutu batzuk geroago atxilotu zuten, hilketa saiakera egotzita. Azkenean, emakumea 22:30 aldera hil zen, ospitalean.