I-25eko manifestatzaileek ez dute Kongresua inguratzea lortu

I-25eko koordinatzaileak deitutako manifestatzaileek ez dute Kongresua inguratzea lortu Ganbara inguruko kale batetik barrena, eta Neptuno plazara itzultzea erabaki dute, kontzentrazioa hasi den lekura.

Plaza horretan bildu direnek 21:00ak baino lehen bi biltzar egin dituzte eta Kongresua babesten duten hesiak apaindu dituzte aldarrikapenekin. Prado pasealekurako bidea hartu dute, horren ostean Lope de Vega kaletik joanez, Beheko Ganbarara gerturatzeko.

Lope de Vega Leon kalearekin elkartzen den gunean, Polizia Nazionaleko furgoi batek aurrera jarraitzea debekatu die, eta deialdia egin duten pertsonetako batzuk agenteei martxa amaitzea uzteko konbentzitzen saiatu dira.

Halere, poliziek manifestazioa legez kanpokoa zela gogorarazi die, horren berri eman ez dutelako, eta buelta ematea eta hasierako gunera itzultzea eskatu diete. Manifestatzaileek kasu egin diete.

Manifestatzaileen pankarta batean "PPSOE dimisioa" irakur zitekeen, eta Kongresuaren lehoi nagusietako baten irudia zegoen.

Protesta baketsua izan da, eta trafikoa 19:30ean itxi dute. 22:00etatik aurrera, Kongresuan izandako Estatuko Aurrekontu Orokorrei buruzko eztabaida amaituta, deialdia bertan behera utzi dute. Kongresurako sarbidea babestu duen hesian, besteak beste, honako hauek irakurri zitezkeen: "Zein bake ogirik gabe?", "Legez kanpoko Gobernuak ez gaitu ordezkatzen eta "Kaleratutako familiei derrigorrezko erreskatea".

Baimenik eskatu gabe

Oraingo honetan, 2013ko Estatuko Aurrekontu Orokorren kontra egin dute protesta.

Koordinatzaileak bere webgunean azaldu duenez, Kongresua era "literalean eta metaforikoan" inguratzeko asmoa dute, "indarkeriarik erabili gabe, eta adimenarekin", eztabaidarekin batera izanez.

Irailaren 25ean, 26an eta 29an egindako protestetan 40 atxilotu eta 60 zauritu baino gehiago izan arren, koordinatzaileak esan du ez dutela beldurrik, eta Kongresuan aurrean euren haserrea erakusten jarraituko dutela gaineratu du.

Aurreko deialdiak Gobernuak Madrilen duen Ordezkaritzari jakinarazi ez dizkioten moduan, oraingoan ere gauza bera egin dute, erakunde horrek hauen "pausoak" badakizkielako. "Ez da baimenik eskatuko. Dagoeneko jakinarazita dagoela uste dugu. Desobedientzia zibil baketsuaren ekintza da", azaldu du bozeramaileetako batek.

6.000 euroko zigorraBozeramaileak azaldu duenez, Cristina Cifuentesek zuzentzen duen departamentuak 6.000 euroko zigorra jartzea erabaki du, Kongresuaren inguruan izango ziren protesten berri eman zion lehen pertsonari.

Fernandez Diazek Kongresua bortxaezina dela esan du

Jorge Fernandez Diaz Barne ministroak esan duenez, "Kongresua ezin da bortxatu, Konstituzioak jasotzen duen moduan".

Ganberako pasilloetan, ministroak adierazi du Polizia Kongresuaren inguruan ezarriko dela, "biltzeko eta manifestatzeko eskubidea bermatzeko, legearen barruan, eta Kongresua bortxaezina den agindu konstituzionala betetzeko"

Segurtasun handiagoa larunbateko manifestazioan

Larunbatean, hilaren 27an, manifestazioa deitu du Madrilen I-25 mugimenduak. Hitzordu horretarako 1.300 agenteko dispositiboa jarriko dute martxan.