Gizartea -
TITULAR NAGUSIAK
Albiste izango dira: Covid iraunkorra, Bingen Zupiriaren agerraldia eta Reala - Real Madril, zuzenean
Gaurkoan albiste izango direnen laburpena, bi hitzetan.
EITB MEDIA
Honako gai hauek hartuko dituzte gaur, 2025eko otsailaren 26an, hedabideetako lerroburu nagusiak:
- Covid iraunkorraren unitatea: Gaurtik martxan da Euskal Autonomia Erkidegoko covid iraunkorreko lehen unitatea, Basurtuko ospitalean. Atal berria neurologia zerbitzuaren parte da, eta patologia hori duten pazienteak artatuko ditu. Gaixoek, infekzioa gertatu eta urte batzuetara, sintoma ezgaitzaileak izaten jarraitzen dute. Lehen fase honetan, Basurtuko unitateak hiru lurraldeetako gaixoei emango die zerbitzua. Hala ere, asmoa da etorkizunean Gipuzkoak eta Arabak ere horrelako unitateak izatea.
- Bingen Zupiriaren premiazko agerraldia: Bingen Zupiria Eusko Jaurlaritzako Segurtasun sailburuak Eusko Legebiltzarrean premiazko agerraldia egingo du (11:30), otsailaren 2an Donostian Ertzaintzak egindako jardunari buruz informatzeko. Ertzaintzak 32 urteko emakume kolonbiar bat atxilotu zuen, baina Zainketa Berezien Unitatean ospitaleratu behar izan zuten gero. Zauritutako emakumeak hobera egin du. Medikuen azken partearen arabera, iktusa izan zuen, ez burezurreko traumatismoa.
- Reala - Real Madril, zuzenean: Reala - Real Madril Errege Kopako finalerdietako kanporaketa zuzenean jarraitu ahalko da eitb.eus-en eta ETB1en. Joaneko partida gaur 21:30ean hasiko da Reale Arenan. Itzulerako partida, apirilaren 1ean jokatuko da (21:30ean) eta kasu honetan ere eitb.eus-en eta ETB1en zuzenean ikusi ahal izango da.