Gizartea -
'Kongresua inguratu'
Kongresuko protesta deitu zutenei espedientea ireki die Gobernuak
Urriaren 23an Diputatuen Kongresua inguratzeko deialdia 'legez kanpokoa zen', Espainiako Gobernuaren Ordezkaritzak adierazi duenez.
Erredakzioa
Espainiako Gobernuaren Ordezkaritzak espediente administratibo zigortzailea ireki die, urriaren 23rako Diputatuen Kongresua inguratzeko deialdia egin omen zuten 50 lagunei; izan ere, Gobernuaren hitzetan, protesta-ekitaldia "legez kanpokoa" izan zen legeak dioen bezala jakinarazi ez zutelako aurretik.
Protesta deitu omen zuten lagunak identifikatu zituen Poliziak, Cristina Fuentes Espainiako Gobernuak Madrilen duen ordezkariak jakinarazi duenez. "Manifestazioak askatasun osoz egin daitezke eskubide konstituzionala delako, baina aurrez Espainiako Gobernuaren Ordezkaritzari jakinarazi behar zaio".
Halaber, manifestazioaren berri ematerakoan, "legeak ezartzen dituen hainbat baldintza bete behar dira, eta atzo ez zen horrelakorik gertatu", gaineratu du.
Irailaren 25eko manifestariek ez zuten Diputatuen Kongresua inguratzea lortu urriaren 23an. Espainiako Gobernuak Madrilen duen ordezkaritzak jakinarazi duenez, 2.000 manifestari inguru elkartu ziren bertan.
