Muruetako Kamiñoko jatetxeak erosi du Gernikako gazta, 5.700 euroan

100.000 lagun inguru bildu dira Gernikako Urriko Azken Asteleheneko Azokan, Euskal Herriko nekazaritza azoka nagusienetarikoan. Udaletik balantze positiboa egin du Iñaki Gorroño Azoken saileko arduradunak.

Aurtengo edizioan nekazaritza produktuz osatutako 286 saltoki daude Gernikako Udalak jakinarazi duenez.

Saltoki gehienetan gazta (65), barazkiak (43) eta txakolina (20) aurki daitezke. Halaber, frutak, eztia, esnekiak, artisautza-lanak (54 saltoki) eta nekazaritza-makinak (17 saltoki) ere badaude salgai.

Egunean zehar, barazki, fruta, landare, txakolin, ezti eta gazta onenak saritzeko lehiaketak egin dituzte.

Zeanuriko Jon Etxebarriarena izan da gazta irabazlea. Ordiziakoan ere berak irabazi zuen eta orduan Catalana Occidente aseguru etxeak 7. 400 euro ordaindu zituen gazta erdiagatik; oraingoan, Muruetako Kamiñoko jatetxeak 5.700 euroren truke erosi du.

Bestalde, Udalak eta BBK-k emandako sariak hauek izan dira: Barazkietan Urdulizeko Adela Andikoetxea; Jose Etxebarria (Gatika) frutetan; Txilar eztian Zornotzako Balentin Llona; Ezti milalorean Jabier Larrinaga (Kortezubi); loratan Gernika-Lumoko Mari Carmen Alzibar; Jose Antonio Torre (Larrabetzu) txakolin zurian eta gorrian; eta Zabala Txakolina (Bakio) txakolin beltzean.

Gainera, lau pilota partida egin dituzte eta, bertsolariek ere giroa animatu dute Gernikan. Andoni Egañak, Sebastian Lizasok eta Oihane Enbeitak hainbat bertso-saio eskaini dituzte.

Azokaren ondorioz, Artekale, Donibane, Pasealeku, Industria, Joan Kaltzada eta Urtarrilak Zortziko kaleak trafikorako itxita daude.