Gizartea -
ERASOAK
Bi pertsona zauritu dituzte Gasteizen, bata lapurreta batean eta bestea borroka batean
Batetik, gizon gazte bat zauritu dute goizaldean labanaz, telefono mugikorra lapurtu ostean, eta, bestetik, emakume bat zauritu dute sabelean kristal zati batekin, borroka batean parte hartzen ari zela.
AGENTZIAK | EITB MEDIA
Bi pertsona arin zauritu dituzte bart Gasteizen, bi gertakaritan. Udaltzaingoak eman du bi erasoen berri, baina oraingoz ez dute atxiloketarik egin.
Batetik, gizon gazte bati lapurreta egin diote goizaldean, telefono mugikorra kentzeko, eta labana batekin eraso diote. Biktima Txagorritxu ospitalean artatu behar izan dute, ebakiak baitzituen hanka batean, bizkarrean eta bularrean. Alta jaso ondoren, salaketa jarri du.
Bestetik, emakume bat zauritu da goizaldean, Mateo Benigno Moraza kalean beste emakume batekin borrokan ari zela. Antza denez, sabelean zauri arin bat zuen, edalontzi hautsi batekin egindakoa, ziur aski. Hori ere ospitalera eraman behar izan dute artatzera.