Gizartea -
Gasteizen
Gizon bat atxilotu dute mozkortuta zihoala hiru istripu eragiteagatik
Atxilotutakoak, 49 urteko gizonezkoak, oinezko bat harrapatu, gorriz zegoen semaforo bat pasatu eta bi kotxeren aurka talka egin zuen.
Erredakzioa
Gasteizko Udaltzaingoak 49 urteko gizonezko bat atxilotu zuen ostiralean, mozkortuta zihoala hiru istripu eragiteagatik. Oinezko bat harrapatu, gorriz zegoen semaforo bat pasatu eta bi kotxeren aurka talka egin ostean atxilotu zuten.
Gidaria oso azkar zihoan Gasteizko Mendiola bidetik eta Adurtza kalera iritsitakoan, 59 urteko oinezko bat kolpatu zuen. Hasiera batean minik ez zuela pentsatu zuen arren, geroago Santiago ospitalera joan behar izan zuen.
Gidaria ez zen gelditu eta gorriz zegoen semaforo bat pasatu ostean, Zumakadi ibilbidetik zihoala, kotxe baten aurka aurrez aurre talka egin zuen. Talkaren ondorioz, 56 urteko emakume batek zauri arinak izan zituen eta Txagorritxu ospitalean artatu behar izan zuten.
Atxilotutakoak aurrera jarraitu zuen, aparkatuta zegoen ibilgailu baten aurka talka egin zuen arte. Lekuko batek bertan atxiki zuen, udaltzainak bertaratu bitartean. Alkoholemia proban positibo eman zuen.
Mozkortuta zegoela baieztatu ondoren, atxilotu egin zuten, trafikoaren segurtasunaren kontrako delitu bat egotzita.