Memoria historikoa aldarrikatu du San Josek "giza eskubideekin konprometitutako etorkizun baterako"

Eusko Jaurlaritzak omenaldia egin die gaur, igandea, Gurseko kontzentrazio esparruko errefuxiatuei. Ekitaldian, Justizia eta Giza Eskubideen sailburu Maria Jesus San Josek deitoratu egin du gaur egun "gorroto mezuak" ugaritzen ari direla, "gazteen artean modu kezkagarrian ugaritu ere". Horregatik, memoria historikoa aldarrikatu du, "giza eskubideekin eta pertsonen duintasunarekin konprometitutako etorkizun bat eraikitzeko bidean".

Gurseko kontzentrazio esparruan egin ditu adierazpenok. Bertan, nabarmendu du Europako iraganari "begiratu eta ulertu" beharra dagoela, hots, "inoiz gizateriak egin duen ankerkeria handiena" bultzatu zuten "gorroto sustraiak" ezagutu behar direla, "giza eskubideekin eta pertsonen duintasunarekin konprometitutako etorkizun bat eraikitzeko".

Milaka lagun kontzentrazio esparru horretara eraman zituen pasarte lazgarria gogoan, iraganari begiratzeko orduan "hausnarketa eginez eta modu kritikoan" egiteko eskatu du sailburuak.

San Joserekin batera, Ibone Bengoetxea eta Mikel Torres lehendakariordeak ere izan dira, baita Susana Garcia Chueca Mugikortasun Jasangarriaren sailburua eta Alberto Alonso Memoriaren, Bizikidetzaren eta Giza Eskubideen Institutuko zuzendaria ere.