Albiste izango dira: Irungo krimena, dohaintzak seme-alabei eta merkataritza gerrari buruzko negoziazioak

Honako gai hauek hartuko dituzte gaur, 2025eko apirilaren 11n, hedabideetako lerroburu nagusiak:

- Irungo krimena: Gizon baten gorpua aurkitu zuten asteazkenean Irungo (Gipuzkoa) etxebizitza batean, indarkeria zantzuekin. EITBk jakin duenez, gorpua ahoa estalita eta aulki bati lotuta zegoen. Ikerketa sekretupean dago.

- Dohaintzak seme-alabei: Familia barruan egindako dohaintzak nabarmen igo dira azkenaldian. Gurasoek seme-alabei egindako opariak dira, eta, batik bat, etxebizitzak edota etxearen sarrera ordaintzeko dirua ematen zaie. Espainiako Estatuan, % 133 igo dira, eta Hego Euskal Herrian ere nabaritu da igoera urte hauetan, baina askoz apalagoa izan da, % 9,2koa. Bergaran notario lanetan aritzen den Maria Longarte Ulaciaren iritzian, Hego Euskal Herrian igoera apala izatearen arrazoietako bat izan daiteke hemen seme-alabei laguntzeko beste erreminta batzuk erabiltzen direla, zergak ordaintzeko garaian onuragarriagoak: oinordetza-itunak eta maileguak.

- Merkataritza gerrari buruzko negoziazioak: Europako Batzordeak bertan behera utzi du muga-zergen aplikazioa, Ameriketako Estatu Batuetako Gobernuak altzairuaren eta aluminioaren Europako inportazioen aurka onartu zituenei erantzuteko sortutakoak, Washingtonekin negoziaziatzeko, AEBk muga-zerga orokorrak 90 egun atzeratzea erabaki ostean.