Pertsona bat larri zauritu da Zornotzan, kamioi baten eta auto baten arteko istripuan

Pertsona bat larri zauritu da gaur goizean Zornotzan (Bizkaia) izan den trafiko istripuan; auto batek eta kamioi batek elkarren kontra jo dute, eta autoaren gidaria da zauritutakoa. Gurutzetako erietxera eraman dute.

Eusko Jaurlaritzako Segurtasun Sailak jakitera eman duenez, N-634 errepideko 87. kilometroan izan da ezbeharra, Euba auzoaren parean, 07:30ean.

Errepidea itxi egin dute bi noranzkoetan ia bi orduz, eta ondorioz, auto-ilarak sortu dira Zornotza eta Iurreta artean. 09:30 inguruan erreietako bat zabaldu dute, eta txandaka eman diete paso bi noranzkoetako ibilgailuei. Handik ordu erdira, behin istripua izan duten kamioia eta autoa errepidetik erretiratuta, bi erreiak zabaldu dituzte eta egoera bere onera etorri da.

Istripuaren lekura joan dira suhiltzaileak, osasun-zerbitzuetako langileak eta Ertzaintzako agenteak.