Giro ezegonkorra gaur, ekaitzak biharko

Eguraldi ezegonkorra gaurko. Erdi mailako hodeiak, goi-hodeiak eta bero-hodeiak agertuko dira. Ezegonkortasunaren ondorioz, zaparrada trumoitsuak bota ditzake edonon eta noiznahi, baina probabilitatea handiagoa izango da hegoaldean eta mendebaldean. Nahiz eta aroa ezegonkorra izan, barealdiak ere izango dira eta ostarteak zabalduko dira. Barnealdean, hego-ekialdeko haizea ibiliko da, bolada gogorrekin haizeguneetan. Kostaldean, haizeak ipar-ekialdera egingo du arratsaldean. Tenperatura maximoetan ia ez da aldaketarik izango barnealdean, eta pixka bat jaitsiko dira kostaldean.

Ostiralean, zaparrada trumoitsuak botatzeko probabilitatea handiagoa izango da. Zerua hodeitsu egongo da, erdi mailako hodeiekin eta goi-hodeiekin, eta tarteka estalita geratuko da bero-hodei trinkoagoekin. Zaparrada trumoitsuak botako ditu noizbehinka, eta zenbait lekutan handiak izan daitezke. Hego-ekialdeko haizea nagusituko da, bolada gogorrekin haizeguneetan. Tenperaturan ez da aldaketa handirik izango.

Larunbatean, eguraldi argia, tarte eguzkitsuekin. Goizean, zeruan hodei bakan batzuk ager daitezke, baina nahiko garbi egongo da. Arratsaldean, bero-hodeiak ugaritu egingo dira, bereziki barnealdean, eta baliteke han-hemenka zaparradaren bat edo beste egitea. Hegoaldeko haizea ibiliko da, bolada gogorrekin haizeguneetan. Tenperaturan ez da aldaketa handirik izango, edo agian pare bat gradu igoko dira maximoak.

Zerua tarteka hodeitsu egongo da igandean, goizean hodeiak ugaritu eta hodeitsu edo oso hodeitsu geratuko da. Zaparrada txiki-ertainak bota ditzake, bereziki egunaren bigarren zatian. Baliteke trumoi-ekaitzak izatea. Mendebaleko haize ahul-bizia ibiliko da, egunaren lehen zatian hego-mendebala nagusituko da. Tenperatura gutxi edo nahikoa jaitsiko da.

Astelehenean, zerua hodeitsu egongo da, tarteka oso hodeitsu. Euri txiki-ertaina egingo du. Iparreko haize ahul-bizia ibiliko da, bolada biziekin. Tenperatura minimoetan ez da aldaketarik izango, eta, izatekotan, gutxi jaitsiko dira. Tenperatura maximoak nahikoa jaitsiko dira.