Gizartea -
Indarkeria matxista
19 urteko mutil nafar bat atxilotu dute Valentzian, taldean sexu-eraso bat egitea egotzita
Gainerako hiru atxilotuak errioxarrak dira. Guztiak epailearen esku geratu ziren igandean, eta kautelazko neurriekin aske geratu ziren. Emakume bati ukituak egiteagatik ikertuko dituzte.
Agentziak | EITB Media
Igande goizaldean Valentziako hondartzaren ondoko aisialdi eremu batean emakume bati taldean sexu-erasoa egin omen ziotelako atxilotutako lau gazteak, tartean nafar bat, aske utzi dituzte, kautelazko neurriekin. Valentziako hiriburuko 5. zenbakiko Instrukzio Epaitegiaren aurrean aldizkako agerraldiak egin beharko dituzte.
Polizia Nazionalaren arabera, atxilotuek 19 urte dituzte, horietako hiru errioxarrak dira, eta laugarrena, nafarra. Igandean utzi zituzten aipatutako epaitegiaren esku.
Ukituak egiteagatik ikertuko dituzte
Valentziako Erkidegoko Justizia Auzitegi Nagusiak jakitera eman duenez, aske utzi zituzten lau mutilak, baina ukituak egiteagatik ikertuko dituzte.
Udaltzaingoak igandean atxilotu zituen lau gazteak, goizaldean Valentziako hondartzaren alboko aisialdi eremu batean emakume bati taldean egindako sexu-eraso batekin zerikusia zutelakoan.
Polizia-iturrien arabera, atxiloketa 07:30ean jazo zen, Emakumeen Salaketa eta Arretarako Bulegoan salaketa jarri ondoren.
Salatutako gertakarien arabera, hainbat gizonek sexu-erasoa egin diote emakumeari hiriko hondartzan dagoen aisialdiko lokal baten inguruan.
Atxiloketa Valentziako udaltzainek egin dute, baina, gertakarien izaera dela eta, ikerketa Espainiako Poliziaren esku dago, iturrien arabera.