Gizartea -
TRAFIKO
Gidatzean distrakzioak saihesteko kontrolak indartuko ditu Ertzaintzak maiatzaren 9tik 11ra
Euskadin, 2024an, zirkulazio-istripuen ia heren bat gidatzean gertatutako distrakzioek eragin zuten, eta, horren ondorioz, Ertzaintzak eta udaltzaingoek errepideetako zaintza areagotuko dute funtsezko hiru egunetan.
EITB MEDIA
Ertzaintzak, udaltzaingoekin koordinatuta, EAEko bide-sareko kontrolak indartuko ditu maiatzaren 9tik 11ra bitartean, gidatzean izaten diren distrakzioei aurre egiteko; izan ere, 2024an, ezbehar-kopuru handi baten eragile nagusietako bat izan zen hori.
Datu ofizialen arabera, aurten izandako istripuen % 29,54 gidariek arreta galtzeak eragin zuten, gehiegizko abiadurak edo alkohol-kontsumoak baino gehiago.
Distrakzio arruntenen artean telefono mugikorra erabiltzea nabarmentzen da. Gidatu bitartean eskuetan eramateak, ibilgailua semaforo batean geldituta edo auto-ilara batean egonda ere, gidabaimeneko 6 puntu galtzea dakar. Gailua euskarri batean dagoela manipulatzeak ere hiru puntu kentzea dakar.
Era berean, entzungailuekin gidatzeak, radar detektagailuak erabiltzeak eta bideoak edo telebista ikusteko gailuak eta antzeko ekipoak manipulatzeak 200 eurorainoko isuna dakarte, eta hiru puntu galtzea ere.
Eusko Jaurlaritzak prebentzio neurriak hartzearen garrantzia gogorarazi du, hala nola mugikorrean "auto modua" aktibatzea, musika gailua bolanteko kontrolak erabilita maneiatzea eta GPSa ibilbidea hasi aurretik programatzea.
Kanpaina hori trafikoa eta garraioa zaintzeko eta kontrolatzeko 32 kanpainaren urteko egutegiaren parte da. Kanpaina horren helburua da EAEko errepideetako ezbehar-kopurua murriztea. Distrazioek eragindako istripu ohikoenen artean, hauek daude: bidetik irtetea, aurrez aurreko talkak, atzetiko talkak eta harrapatzeak.