Bilbon hildako gizonen ustezko hiltzailearen kasua epaituko dute asteazken honetatik aurrera

Bilbon eraildako gizonen ustezko hiltzailearen kasua epaituko dute asteazken honetatik aurrera 2021eko urriko gertakariak. Hain zuzen ere, Nelson David akusatua homizidio, iruzur eta lapurretagatik epaituko dute.

Ustezko hiltzailearen telefonoaren ubikazioak aditzera ematen du biktimaren etxean zegoela Nelson David akusatua, Bilboko Zazpikaleetan bizi zen 43 urteko gizon baten etxean. Akusazioaren arabera, arnasik gabe utzi zuen eta hil egin zuen. Ondoren, biktimaren bankura deitu, klabeak aldatu eta diru-transferentzia agindu zuen.

Akusazioak eta defentsak zehaztuta dituzte estrategia prozesalak. Defentsak frogak falta direla dio, eta akusazioak onartzen du ez dagoela lekukorik ez autopsia erabakigarririk, baina bai errudun dela ebazteko adina zantzu.

39 urteko kartzela-zigorra eskatzen du akusazio partikularrak: 25, hilketagatik, hainbat larrigarrirekin, adibidez, LGTBI kolektiboaren kontrako jarrera diskriminatzailea; 5 urte, indarkeria erabiliz etxe batean lapurreta egiteagatik; 3 urte, identitate usurpazioagatik, eta 6 urte, iruzurragatik.

Fiskaltzak 16 urte eta hiru hilabeteko espetxealdia eskatuko du (homizidioagatik 13 urte, iruzurragatik 3 urte eta lapurretagatik 3 hilabete). Defentsak, ostera, absoluzioa eskatuko du.

Kontaktuen aplikazio baten bidez egiten zituen hitzorduak, horrela jokatzen omen zuen Nelson Davidek. Kartzelan dago orain, dagoeneko homizidio saiakera bategatik zigortuta, eta aste honetako epaiketaz gain, beste bost auzi ere zabalik ditu: batean hilketa saiakera egotzi diote, gainerako lauretan, hilketa.