Irungo Udalak euskara "bigarren mailan" utzi duela salatu dute

Euskaraldiaren amaiera ekitaldiak polemika eragin du Irunen (Gipuzkoa). Larunbat honetan Elatzeta elkartea ikuskizuna eskaintzekoa zen San Juan plazan, Txorimaloak Soinu Taldearen laguntzarekin.

Udalaren baimena zuten horretarako, eta antolatzen ari zirela, crossfit lehiaketa bateko antolatzaileak agertu ziren euren ekimena prestatzeko, Udalaren baimena zutela esanez.

Dirudienez, Udaleko Kirol Zerbitzua eta Euskara Zerbitzua ez ziren behar bezala koordinatu egutegia egiterakoan, eta bi ekitaldiak egiteko baimena eman zuten toki eta egun bererako.

Azkenean, Euskaraldikoek mugitu behar izan zuten ekitaldia lekuz, eta Urdanibia plazan egin zuten. Garbiñe Etxenagusia Txorimaloak Soinu Taldeko kidearen arabera, horrek agerian uzten du Irungo Udalak euskara "bigarren mailan" jarri duela.