Gizartea -
Taxi zerbitzua
Bilboko aireportuko taxi-gidariek egun libreetan lan egiteko aukera izango dute
Borondatezko erabakia izango da lan egitea, eta dagoeneko zenbait taxilarik aurreratu dute horretarako prest daudela, onartu bidean dauden 24 lizentziak martxan jarri arte.
EITB MEDIA
Egun libreetan eta oporraldian lan egiteko baimena eman die Bizkaiko Foru Aldundiak Bilboko aireportuko taxi-gidariei, eurek nahi badute bederen. Aldi baterako neurri honen helburua da zerbitzua indartzea; izan ere, azkenaldian erabiltzaile asko kexatu dira zerbitzuak dituen gabeziez.
Salatu dutenez, bereziki aste barruan (egunaren azken orduetan) izaten dira taxi bat hartzeko arazorik handienak. Hori jakinda, Aldundiak irtenbide bat bilatu nahi izan du, zerbitzua bermatu ahal izateko.
Taxistentzat borondatezko erabakia izango da lan egitea, alegia, ez dute ezelako beharrik izango, baina dagoeneko zenbait taxilarik aurreratu dute horretarako prest daudela, onartu bidean dauden 24 lizentziak martxan jarri arte.
Gaur egun 111 taxilari daude lanean Bilboko aireportuan. Azken urteetan, ordea, zerbitzua urri geratu da, bidaiari kopurua nabarmen hazi delako, eta 2000. urtetik ez dutelako taxi kopurua handitu.