Gizartea -
ETXEGABETZEA
Dozenaka lagunek bikote baten etxegabetzea geldiarazi dute Iruñeko Alde Zaharrean
7:30etik aurrera elkarretaratzea egin dute San Lorentzo kaleko 17. atariaren aurrean, Polizia Nazionalak bikotea etxetik botatzea galarazteko. Ia hiru ordu geroago, eta istilurik izan gabe, Poliziak alde egin du.
EITB MEDIA
Dozenaka lagunek, Kontseilu Sozialistak eta Etxebizitza Sindikatuak deituta, bikote baten etxegabetzea geldiarazi dute Iruñeko San Lorentzo kalean. 7:30etik aurrera elkarretaratzea egin dute kale horretako 17. atariaren aurrean, Polizia Nazionalak bikotea etxetik botatzea galarazteko.
Ia hiru ordu geroago, eta istilurik gabe, Poliziak alde egin du. Dozenaka pertsonek, gehienak gazteak, etxegabetzea gelditu izana ospatu dute. Etxetik bota behar zuten emakumea jaitsi egin da, bertaratutakoei babesa eskertzeko.