Aire zabaleko jarduerak saihesteko eskatu dute Bilboko eta Donostiako udalek, hauts-gandua dabilelako

Eusko Jaurlaritzak ohartarazi duenez, airean partikulen kontzentrazioa handitu dezakeen Saharako aire-masa bat iritsi da. Hori dela eta, Bilboko eta Donostiako udalek ariketa fisikorik ez egitea eta kalean tarte luzez ez egotea aholkatu dute.

Eusko Jaurlaritzako Ingurumen Sailak jakinarazi du egunean zehar ozono-kontzentrazioak igoko direla itsasertzean, eta kontsultatutako modeloek aurreikusten dutela Afrikako aire-masa bat ibiliko dela bertan, eta horrek airean partikulen kontzentrazioa handitu dezakeela.

Aurreikuspen horren aurrean, Bilboko eta Donostiako udalek zenbait aholku eman dituzte osasun-ondorio kaltegarriak minimizatzeko, hauts-gandua joan arte.

Hala, herritarrei, oro har, eta bereziki, arnasketa-nahasmendu kronikoak (gaixotasun kardiobaskularrak edota diabetesa) dituzten pertsonei, haurrei eta adinekoei gomendatu diete aire zabalean ariketa fisikorik ez egitea.

Gainera, ahal den neurrian joan-etorrietarako garraio publikoa erabiltzea eta alergiak eragin ditzaketen eta kutsadura atmosferikoarekin lotutako sintomatologia larriagotu dezaketen agenteekin (hautsa, polena, animaliak, etab.) kontaktua saihestea proposatu dute.

Aire zabalean tarte luzez egotea saihestea ere eskatu dute, batez ere eguerdian.

Gainera, komeni da tokian tokiko kutsadura-mailen bilakaeraren berri izatea, eta informazioa Euskadiko airearen kalitateari buruzko informazioa ematen duen webgune ofizialean bilatzea.