Mundua -
Ural mendietan
Errusian jausitako meteoritoak 30 milioi dolarreko kalteak eragin ditu
Gutxienez, mila lagun zauritu dira, eta 100.000 etxebizitzetatik gora kalteak jasan dituzte.
Erredakzioa
Ural mendietako Cheliabinsk eskualdeko agintariek jakitera eman dutenez, Errusian jausitako meteoritoak 30 milioi dolarreko kalteak eragin ditu. Gutxienez, mila lagun zauritu dira meteoritoaren jausieraren ondorioz.
"100.000 etxebizitza inguruk jaso dituzte kalteak", azaldu du Mijail Yurevichej eskualdeko gobernadoreak prentsaurrekoan, "meteoritoak 30 milioi dolarreko kalteak eragin ditu". Eztandaren ondorioz apurtutako leihoen % 30 konpondu dituzte dagoeneko. Hainbat eskualdetan 20 gradu zero azpitik izan dira.
Gainerako kalteak datorren astean konponduko dituzte, Sobietar Batasunaren garaikoak diren beirateak salbu (horretarako bi aste behar izango dituztelako). Yurevichejek azaldu duenez, Izotzaren Jauregiak kalte handienak jaso ditu, egitura deformatu delako.
'Cheliabinskeko bolidoa' Satkako hiritik 80 kilometrora jausi da 09:20ean tokiko orduan (04:20ean Espainiako orduan). Hedatze-uhinak ondoko eskualdeetan nabaritu da, baina Kazajistaneko herrialdean ere. Zauritu gehienak leihoak apurtzerakoan zauritu dira.
