Napolitanok ez du dimitituko eta alderdien arteko akordioa eskatu du

Dimitzeko asmorik ez duela berretsi du larunbat honetan Giorgio Napolitano Italiako Errepublikako presidenteak. Halaber, alderdi nagusien arteko akordioa eskatu du, hainbat erreformetan oinarrituta, Gobernu berria osatu ahal izateko.

Errepublikako Presidentetzako egoitzan komunikabideen aurrean egindako agerraldian Napolitanok iragarri duenez, ,"ideologia desberdineko bi talde murriztu sortuko ditugu, eta Europar Batasunarekin hitzartutako konpromisoen arabera, herrialderako funtsezko gaien zerrenda eskatuko diegu hauei".

Proposamen pragmatikoak

Napolitanok azaldu duenez, talde horiek ideologia desberdinekoak izango dira, eta horren helburua "proposamen pragmatiko eta zehatzak planteatzea izango da, ondoren Parlamentuko indar politikoek partekatu ahal izateko".

"Erakunde, ekonomia eta gizarte alorreko gaiak jorratu beharko dituzte", azaldu du, "gainera, Errepublikako presidente berriaren lanerako erabilgarriak ere izan daitezke auzi horiek"."Une konplikatua bizi dugu eta ezin dut hori ezkutatu, baina egoera gainditu dezakegulakoan nago", azpimarratu du.

Gobernu osatu ezinean daude Italian, eta Napolitanok egindako adierazpen hauek agerian utzi dute Italiako presidenteak kontzentrazio Gobernu baten alde egin duela. Halaber, dimitzeko asmorik ez duela nabarmendu du eta maiatzera arte izango dela karguan adierazi du.

"Nire ekintzak oso murriztuta dauden arren, egoera desblokeatzeko gai naizela uste dut, eta hala saiatu naiz agintaldiaren azken egunera arte", ondorioztatu du.