Margaret Thatcherren hileta apirilaren 17an egingo dute

Margaret Thatcher Britainia Handiko lehen ministro ohiari militar-ohoreak egingo dizkiote apirilaren 17an, hileta-elizkizunean, Downing Streetek gaur jakitera eman duenez. Hileta Londreseko Saint Paul katedralean egingo dute.

Hiru gudarosteetako soldaduek Thatcherren hilkutxaren segizioari lagunduko diote Londreseko kaleetatik, Westminsterreko Jauregitik katedralera arte. Isabel II.a erregina eta haren senarra, Edinburgoko dukea, hiletan izango dira.

Hiletak hots eta ospe handia izango ditu, 2002an Erregina Amari egindakoa bezalaxe. Telebistan emango dute eta mundu osoko pertsona ospetsuak bertaratzea espero da.

Egun bat lehenago lehen ministro ohiaren gorpuzkiak Westminsterreko hil-kaperara eramango dituzte.

Datorren asteazakenean hilkutxa gurdian Saint Paulira eramango dute. Ohorezko goardia batek hartuko du katedralean. Meza amaitu ostean hileta pribatu bat egingo diote.

Komunen Ganberan ezohiko osoko bilkura egingo du asteazken honetan. Atsedenaldian lehen ministro ohi kontserbadoreari omenaldia egingo diote.