Emakume bat bortxatu, eta, askatu ostean, berriz bortxatu dute Indian

Abenduaren 24ko gauean, gizon batek emakume bat bortxatu zuen India hegoaldeko herri batean, eta, minutu gutxi batzuk geroago, horrek askatutakoan, beste bortxatzaile talde batek emakumea harrapatu eta horietako seik berriz bortxatu zuten txandaka, bertako hedabide batek zabaldu duenez.

Bortxaketa bikoitza Karaikal Indiako herrian egin zuten, Tamil Nadu estatuan: kazetariek Smitha deitu duten gaztea kalera irten zen, lagun batzuekin etxe batean egon eta gero,  Times of India egunkariak kontatu duenez.

Smithak Monika Bahardwaj Poliziako superintendenteari azaldu dionez, hiru gizon bera zelatatzen ibili ziren, eta, bakarrik zegoela ikusi zutenean, gatibu hartu, eremu huts batera eraman eta horietako batek bortxatu zuen.

Askatu zutenean, Smithak etxean berarekin egon ziren lagunei deitu zien, laguntza eske, baina, horiek aurkitu aurretik, zazpi pertsonako beste talde batek harrapatu zuen, eta horietako seik bortxatu egin zuten.

Lagunek aurkitu, eta bortxatzaileei aurre egin zieten; borrokan aritu ziren, harik eta, auzokoek abisatuta, Polizia heldu zen arte.

Segurtasun indarrek hamahiru pertsona identifikatu zituzten auziarekin lotuta, eta horietako hamar atxilotu zituzten, biktimaren hiru lagun tartean "Poliziari krimenaren berri emateko deitu ez izana" leporatuta.

2012ko abenduaren 16an New Delhin unibertsitateko ikasle bat taldeka bortxatu eta hil eta gero sortu ziren protestek bultzatuta, Indiako Gobernua eraso sexualen aurkako zigorra handitzen dihardu, baina ohikoak dira tamalez horrelako gertakariak Asiako herrialdean.