Mundua -
Bisita ofiziala Kenyan
Obama Nairobira heldu da segurtasun neurri handien artean
Kenya bisitatzen duen eta aldi berean jardunean dagoen AEBetako lehen presidentea da Obama. Agintariek 10.000 polizia hiriko kaleetan zabaldu dituzte segurtasuna bermatzeko.
Agentziak | Erredakzioa
Barack Obama AEBetako presidentea Nairobira heldu da gaur segurtasun neurri handien artean. Hiru eguneko bisita ofiziala egingo du Obamak Kenyan. AEBetako buruzagiaren aita Kenyan jaio zen. Ondoren Etiopiara joango da.
Air Force One presidentearen hegazkinak Nairobiko Jomo Kenyatta nazioarteko aireportuan lur hartu du. Aldez aurretik aireportua itxi dute.
Kenya bisitatzen duen eta aldi berean jardunean dagoen AEBetako lehen presidentea da Obama. Besteak beste, Uhuru Kenyatta Kenyako presidenteak eta Robert F.Godec AEBetako enbaxadoreak Obama hartu dute aireportuan.
Segurtasun dispositibo handia
Kenyako hiriburuaren errepide nagusiak eta baita auzo osoak ere itxi dituzte, ibilgailu zein oinezkoentzako. Itxita egongo dira datorren igandera arte.
Gidatzeko eta ibiltzeko oztopoek eta Al Shabaab talde jihadistaren mehatxu terroristak kaleak hustu dituzte, eta hiriburuko ia negozio guztiek itxi behar izan dute.
10.000 polizia zabaldu dituzte buruzagiek hirian. Bien bitartean, AEBetako indarrak Somaliako eta Kenyako itsasoa eta zerua zaintzen ari dira.
Goi-bilera larunbatean eta hitzaldia igandean
Ekintzaileen Munduko Goi-bileran (GES) parte hartuko du Obamak larunbat honetan. Ondoren 1998ko erasoen biktimei eta bizirik atera zirenei omenaldia egingo die AEBetako presidenteak. Nairobiko eta Dar es Salaamgo (Tanzania) enbaxaden aurkako atentatuetan 229 pertsona hil zituzten.
Uhuru Kenyattarekin ere bilduko da. Estatu afari bat eskainiko dio Kenyako presidenteak Obamari, Etxe Zuriaren arabera. Igandean, Obamak hitzaldi bat emango du eta gizarteko ordezkariekin bilduko da. Gauean Etiopiara bidaia egingo du. Asteartera arte bertan izango da.
