Istiluak izan dira Jerusalemeko Meskiten Lautadan

Istilu larriak izan dira gaur goizaldean Meskiten Lautadan, Jerusalem Ekialdeko palestinarren lurralde okupatuan, hain zuzen ere. Dozenaka palestinar saiatu dira bertara sartzeko sarbideak blokeatzen, juduen bisitak oztopatzeko asmoz, Tishá Beav izeneko jaia ospatu ez dezaten.

Israeleko Poliziak jakinarazi duenez, hainbat arabiar gazte talde (horietako zenbait mozorroekin) Al-Aqsako Meskita barruan sartu eta bertan gotortu ziren atzo. Harriak, egurra, eta molotov koktelak bildu dituzte agenteei aurre egin ahal izateko, eta birritan izaten diren bisita turistikoak galarazteko asmoz.

Gaur goizean, berriz, lautadako plaza zentrala hartu dute, eta poliziak iparraldeko eskilarak igotzen hasi direnean, harriak, zementu-blokeak eta molotov koktelak bota dizkiete, Miki Rosenfeld polizia-bozeramaileak jakinarazi duenez. Halaber, iturri horrek argitu duenez, "hainbat agente zauritu dira".

Orduan Poliziak leku sakraturako sarbideak itxi ditu, eta behin egoera kontrolpean izan ostean, bisitak berriro baimendu ditu.

"Juduen eta turisten bisitak normal mantendu dira Tenpluaren Mendiaren zonaldean", adierazi du bozeramaile horrek.