Mundua -
AEB
Emakume bat atxilotu dute Washingtonen, trenbidean yoga egiteagatik
Gertakariak iaz jazo ziren, abenduaren 21ean, West Falls Church (Virginia) geltokian, baina aste honetan atxilotu du.
Agentziak | Erredakzioa
Emakume gazte bat atxilotu dute Washingtongo metroaren trenbidean yoga egiten erakusten zuten argazki batzuk atera ondoren. Segurtasun kamerek grabatu zuten, eta bideoa Interneten bueltaka dabil.
Bertako komunikabideek gaur argitaratu duten bideoan ikus daitekeenez, emakumea yoga egiteko arroparekin jantzita ageri da, kamera daraman gizon batek trenbidera jaisten laguntzen dio, eta emakumeak yogako postura batzuk egiten ditu trenbidean, gizonak argazkiak ateratzen dizkion bitartean.
Trenbidean dauden bitartean, tren bat pasatzen da horien atzetik, beste trenbide batetik.
Posturak egiterakoan (horietako batean buruz behera jartzen da, besoak lurrean eta oinak airean dituela), behin baino gehiagotan erortzen da, horietako batean elektrifikaturik dagoen trenbidearen hirugarren errailetik gertu.
News4 hedabideak azaldu duenez, gertakariak iaz jazo ziren, abenduaren 21ean, West Falls Church (Virginia) geltokian, baina Poliziak ez du emakumea aste honetara arte atxilotu; izan ere, susmagarriak Washingtondik alde egin zuen. Urriaren bukaeran epaituko dute.