Eskuinak jipoitu egin du ezkerra, Hungariako hauteskundeetan

Fidesz oposizioko alderdi kontserbadoreak Hungariako hauteskundeen lehen itzulia irabazi du botoen % 52,7rekin, ia boto guztiak zenbatuta, Europa erdiguneko herrialdeko Hauteskunde Batzorde Nazionalak iragarri duenez.

Orain arte Gobernuan izan den MSZP alderdi sozialistak zigor gogorra jaso du, izan ere, botoen % 19,3 soilik jaso ditu, duela lau urte jasotakoen erdia, krisi ekonomikoaren ondorioz bereziki.

Horren atzetik geratu da Jobbik eskuin muturreko alderdia. Diskurtso arrazista eta antisemita duen alderdiak botoen % 16,7 lortu ditu, 2006ko hauteskundeetan jasotakoen laukoitza.

LMP alderdi ekologistak, duela 14 hilabete sortutakoak, ere Parlamentuan sartzea lortu du botoen % 7,4rekin.

Hungariako hauteskunde sistema konplexuak hala ezarrita, bi aste barru hauteskundeen bigarren itzulia egingo dute irabazleak botoen % 50 eskuratu ez duen barrutietan.

Bigarren itzuli horretan ikusiko da Viktor Orban lehen ministro ohia buru duen Fidesz alderdiak Parlamentuko eserlekuen bi herenak lortuko ote dituen.