64 lagun hil eta beste 118 zauritu dira Iraken, zenbait atentatutan

Gutxienez 64 lagun hil dira gaur Iraken, eta beste 118 zauritu dira Bagdaden eta Ramadi hirian egindako zenbait atentatutan. Al Kaidako bi buruzagi iragan igandean hil zituztenetik jazo den eraso-bolada larriena izan da.

Aurten hildako gehien utzi dituen atentatu-bolada da, izan ere, apirilaren 6an, Bagdaden zenbait lehergailuk eztanda egin ostean 54 hildako izan ziren, eta ia 200 zauritu.

Gaurkoak xiiten kontrako erasoak izan dira eta musulmanak ostiraletan tenpluetara otoitz egitera joan ohi diren orduetan gertatu dira.

Erasoak

Sadr Cityn bi bonba-autok biktima gehien eragin dituzte, 39 hildako eta 56 zauritu, Poliziako iturriek jakitera eman dutenez. Muqtada al Sadr kleriko erradikalaren jarraitzaileek kontrolatzen dute Bagdad ekialdeko auzo hori. Sadr Iranen bizi da.

Amingo barrutian, Bagdadeko ipar-mendebaldean, Mosehn al Hakim santutegi xiitatik gertu, 8 lagun hil eta beste 23 zauritu dira bonba-auto batek eta lehergailu batek eztanda egin ostean.

Hurriya auzoan, beste meskita xiita batetik hurbil, beste bost lagun hil eta 14 zauritu dira, beste bonba-auto batek lehertu eta gero.

Zafaraniya auzoan, Bagdadeko hego-ekialdean, tenplu xiita batetik gertu, beste lehergailu batek sei lagun zauritu ditu.

Beste zapi lagun zauritu dira Rahmaniyako merkatu batean, lehergailu batek eztanda egin ostean.

Ordu batzuk lehenago hasi da eraso-bolada Bagdadetik at, Ramadi hirian. Zenbait lehergailuk bederatzi lagun hil eta 12 zauritu dituzte.

Momentuz ez dituzte atentatuak aldarrikatu, baina Al Kaida jotzen dute egiletzat. Izan ere, talde honek Estatuko erakundeen eta xiiten kontra eraso egin duelako lehenago ere.

Mendekua

Zenbait buruzagi terrorista orain dela gutxi hil ostean mendeku operazio bat izan daitekeela adierazi dute komunikabide lokalek.