Israelek 2.500 etxebizitza gehiago egin nahi ditu Zisjordanian

Israelgo Gobernuak Zisjordanian, palestinar lurretako asentamenduetan, 2.500 etxebizitza gehiago eraikitzeko baimena emango du datorren astean, Avigdor Lieberman Israelgo Defentsa ministroak ostegun honetan jakitera eman duenez.

Palestinar lurretako asentamenduak Zisjordanian dira israeldarren eta palestinarren arteko bake prozesua berrabiatzeko gatazkarik polemikoena; 2014tik ez baita aurrerapausorik eman bake prozesuan.

"Judea eta Samaria osoan eraikitzeko asmoa dugu; iparretik hegora eta komunitate handi zein txikietan", esan du Liebermanek.

Palestinarrek ez diote, oraingoz, Israelgo Defentsa ministroaren iragarpenari erantzun, baina asentamenduok, nolabait, palestinarren etorkizuneko Estatua ezartzea saihesten dute lurrak kentzen dizkietelako. Izan ere, 500.000 israeldar eta 2,6 milioi palestinar bizi dira Zisjordanian eta Ekialdeko Jerusalemen.

Zisjordania, Ekialdeko Jerusalem eta Gazako Zerrenda Palestinako Estatuaren lurrak izan beharko liratekeela uste dute palestinarrek. 1967ren osteko gudan Israelek hartutako lurretako asentamenduak legez kontrakoak direla uste dute herri gehienek.

Israelek, berriz, asentamenduok legez kontrakoak direnik ukatzen du.