Mundua -
Herbehereak
Noa Pothoven nerabea 'jateari eta edateari uzteagatik' hil zen, ez eutanasiagatik
17 urteko herbeheretarra igandean hil zen bere etxean, senide eta lagunak alboan zituela. Haurra zela sexu-abusuak jasan ostean, bere bizitzari amaiera ematea erabaki zuen.
AGENTZIAK | ERREDAKZIOA
Herbehereetan, Levenseinde klinikak atzo baieztatu zuenez, Noa Pothoven 17 urteko nerabe herbeheretarra "jateari eta edateari uzteagatik" hil zen eta ez eutanasiagatik. Horrela, ukatu egin du eutanasia aplikatu ziotela.
"Albiste okerrei amaiera emateko, Noaren lagunek egindako deklarazioa helarazten dizuegu: ez zen eutanasiagatik hil. Bere sufrimenduari amaiera emateko jateari eta edateari utzi zion", baieztatu zuen klinikak hedabideetan zabalduko informazio okerrei erantzunez.
Levenseinde klinikak eutanasia aplikatzea ukatu zion adin txikikoari, 16 urte zituela bere bizitzari amaiera emateko informazio eske joan zenean. Orduan, tratamendu psikiatrikoa jarraitzeko eta bere burmuina erabat garatu arte itxaroteko aholkatu zioten, hots, 21 urtera arte.
Noa Pothoven iragan igandean hil zen bere etxean, senide eta lagunak alboan zituela. Haurra zela sexu-abusuak jasan zituen, eta ordutik trauma osteko estresa, depresioa eta anorexia zituen. Azken urtean, zunda bidez elikatu zen.
"Ez naiz itzulinguruka ibiliko: gehienez ere, hamar egunetan hilda egongo naiz. Urte luzeetako borrokaren ostean, nire borroka amaitu da. Azkenean, nire sufrimendutik askatuko naiz, jasanezina baita. Ez saiatu ni konbentzitzen. Ondo pentsatutako behin betiko erabakia da", idatzi zuen Instagram sare sozialen argitaratutako bere agur mezuan.