Mundua -
Aire bonbardaketa batean
NATOk Gadafiren semea eta hiru biloba hil ditu, Libiak iragarri duenez
NATOK Gadafik Tripolin dituen instalazio militarren aurkako erasoa egin duela esan du komunikatu baten bitartez, baina ez ditu konfirmatu Libiako liderraren semearen eta hiru biloben hilketak
Erredakzioa
NATOren bonbardaketa batean Muamar Gadafi Libiako liderraren seigarren semea, Saif Al Arab Gadafi eta hiru biloba hil dira, Libiako Gobernuaren ordezkariak, Musa Ibrahimek azaldu duenez.
Ibrahimek esan du Al Arab Gadafi zibila zela, Alemanian ikasten zuen 29 urteko mutila, hain zuzen ere. Gobernuko kideek kazetari talde bat bonbardaketa hori izan den etxera eraman dituzte eta misilen erasoek utzitako hiru arrasto zeudela ikusi dute.
Iturri horien arabera, erasoaren unean Gadafi bera eraikin horretan bertan zegoen baina ez da zauritu.
NATOK ez ditu heriotzak konfirmatu
NATOk gaur (igandea) goizaldean komunikatu bat bidali du; bertan, Muamar el Gadafiren erregimenak Tripolin dituen instalazio militarren aurkako "beharrezko" erasoa egin dutela baieztatzen du, baina ez, Libiako liderraren seme bat eta hiru biloba hil dituenik.
Erakundeak dioenez, bart arratsaldeko seiak aldera Tripoliko Bab al-Azizya auzoko "kontrolerako eraikinari" eraso egin diote. "Prentsa ematen ari den informazioen jakinaren gainean nago, baina oraindik konfirmatzeke dago Gadafiren familiako kideen heriotza", esan du Charles Bouchar teniente jeneralak, Libiako misio militarraren buruak.
Kanadako militarrak komunikatuan gogorarazi duenez, NATOren helburu guztiak jatorri militarrekoak eta Gadafiren erregimenak zibilen aurka egiten dituen erasoekin lotura argia dutenak dira.
