Ekuadorrek argi berdea eman die justizia eta prentsa erreformei

Ekuadortarrek larunbatean babesa eman zioten Rafael Correa presidenteari justizian erreformak egiteko eta prentsa arautzeko egindako kontsultan. Edozein kasutan, lehen datuen arabera, uste baino alde gutxiagorekin lortu du garaipen hori.

Hauteskunde Batzar Nazionalean (gaztelerazko CNE siglak) egindako kontaketa azkar batek dio baiezkoak 2 eta 8 puntu arteko aldearekin irabazi diola ezekoari.

Duela hamar egun gobernuarekin kontratuak dituen ikerketa enpresa batek (SP Investigacionesek) egindako inkesta baten arabera, Correak hogei puntuko aldearekin garaituko luke kontsulta. Eta atzo, jendea bozak ematen ari zela egindako galdeketa batek ere horixe jasotzen zuen.

Hauteskunde Batzar Nazionalak emandako lehen datuen arabera baina, baiezkoaren eta ezezkoaren arteko aldea ez litzateke inkestek aurreikusten zutena bezain handia izango. Behin betiko emaitzak edozein kasutan, hemendik egun batzuetara emango dituzte jakitera.

Kazetarien elkarteak behin-behineko emaitzak jakin bezain laster hasi dira adierazpen askatasunaren aldeko protestak egiten. Diotenaren arabera, Rafael Correak prentsan egin nahi duen erregulazioaren bitartez, adierazpen askatasuna mugatu nahi du.

Rafael Correa emaitzak ospatzera irten zen behin-behineko datuak jaso bezain laster. "Herritarren iraultzan" sakonduko zuela esan du, eta gaineratu zuen garaipena oposizioaren, eliza katolikoaren sektore batzuen edota zenbait komunikabideren jarrera "basatia" gaindituz lortu zutela. "Guztiei irabazi diegu" esan du Ekuadorreko presidenteak.