18 hildako poliziaren eta Al Kaidako presoen arteko enfrentamenduan

Gutxienez 18 lagun hil dira igande honetan segurtasun indarren eta Al Kaidarekin zerikusia duten presoen artean Bagdadeko kartzela batean izan den enfrentamenduan, agintariek egin duten balantzearen arabera.

Gertaera Karradako barrutian, Bagdad erdigunean, terrorismoaren aurkako unitatearen egoitzan izan da. Preso batek, segurtasun guardia bati pistola kendu dio, hainbat agente funtzionario tiroz hil ditu eta beste preso batzuen artean armak banatu ditu, Bagdadeko segurtasun indarren bozeramaileak, Al Musaui jeneralak esan duenez.

Hildakoen artean, antza, Al Kaidako buru garrantzitsuetako bat dago, "Bagdadeko Emir" moduan ezagutzen dena, alegia; iragan urrian 50 lagun hil ziren eliza kristau baten aurkako atentatua antolatzeaz akusatuta dago, Al Musauriren arabera.

"Segurtasun indarrek eta guardiek egoerari erantzun egin diote eta kartzelako 11 preso terrorista hil dituzte, horien artean Huthaifa al Bataui, Bagdadeko Emirra, elizaren aurkako atentatua egiteaz akusatuta dagoena", gaineratu du.

Segurtasun indarretako zazpi agente hil dira eta bat zauritu da enfrentamenduetan, jeneralak emandako datuen arabera, eta ziurtatu du espetxeko egoera kontrolpean dagoela dagoeneko eta ez duela inork ihes egitea lortu.

Irakeko polizia alerta goreneko egoeran dago, Osama Bin Laden Al kaidako liderra armada estatubatuarrak iragan astean hil ostean.